Sex létust í strætóslysi í Uppsölum

Að minnsta kosti sex létust þegar tveir strætisvagnar á leið í gagnstæða átt rákust saman rétt utan við borgina Uppsali í Svíþjóð laust fyrir klukkan sjö í morgun. Á fimmta tug til viðbótar slasaðist, þar af þrír lífshættulega.

Sjúkrabílar frá öllum nærliggjandi borgum voru kallaðir á vettvang og þyrlur fluttu þá mest slösuðu á sjúkrahús. Það reyndist erfitt að komast að slösuðum í strætisvögnunum þar sem þeir fóru mjög illa í árekstrinum. Annar þeirra er enn á hliðinni og ekki útilokað að einhverjir kunni að vera undir honum. Áfallahjálp er veitt vitnum að slysinu og aðstandendum fórnarlambanna. Tildrög slyssins liggja ekki fyrir en hálka var á vettvangi.

Aðeins er um mánuður síðan níu manns létust í rútuslysi í Svíþjóð þar sem rúta fór út af hraðbraut og valt.-