Ítalskir hermenn á leið heim frá Afganistan

Hamid Karzai forseti Afganistan hvetur Ítali til að draga ekki herlið sitt út úr landinu. Ítalska þingið hefur hinsvegar ákveðið að flytja alla tvöþúsund ítölsku hermennina sem eru í Afganistan heim. Karzai hefur undanfarna mánuði átt fullt í fangi með að berjast gegn uppreisnarhópum Talibana.

Jaap de Hoop Scheffer aðalritari NATO er í heimsókn í Afganistan og hann sagðist sannfærður um að ítölsku hermennirnir yrðu áfram, að Ítalir mundu ekki hlaupast undan sinni ábyrgð í Afganistan. Romano Prodi forsætisráðherra Ítalíu sagði af sér í gær vegna þess að þingið samþykkti ekki áætlanir hans í utanríkismálum og er pólitísk framtíð landsins í uppnámi.