Ljungberg ætlar að vera áfram hjá Arsenal

Sænski landsliðsmaðurinn Freddie Ljungberg segist staðráðinn í að halda áfram að leika með Arsenal og segist ekki vilja fara frá félaginu þó samningur hans renni út í sumar. Ljungberg hefur verið orðaður við lið eins og AC Milan og Real Madrid.

"Við Arsene Wenger (knattspyrnustjóri) erum á sömu skoðun hvað varðar leikskipulag og mér líður vel hjá Arsenal, svo ég get ekki hugsað mér að fara neitt annað. Það sem skiptir máli er að vera í aðstöðu til að vinna titla og það hef ég alltaf gert hjá Arsenal og vil halda því áfram," sagði Ljungberg og hrósaði stjóra sínum í hástert.

"Það eru nokkrir hlutir sem gera Wenger að sérstökum knattspyrnustjóra og hann velur sér leikmenn ekki aðeins eftir getu heldur eftir því hvernig þeirr falla inn í hópinn og hvernig manngerðir þeir eru. Ég vona að hann verði í tíu ár í viðbót hjá Arsenal," sagði Svíinn.