Ætla að senda þúsundir sjálfsmorðsárásar-manna af stað

Talibanar segjast munu senda þúsundir sjálfsmorðsárásarmanna gegn herliði NATO sem statt er í Afganistan og reynir að ráða niðurlögum þeirra. Frá þessu greindi einn leiðtoga þeirra í samtali við Reutersf-fréttastofuna í dag, sama dag og bandaríski hershöfðinginn Dan McNeill tók við yfirstjórn 33 þúsund manna herliðs NATO í landinu af Bretanum David Richards.

„Við höfum lokið 80 prósentum af undirbúningi fyrir átök gegn bandarískum og erlendum herjum og við erum að hefja stríð," segir Mullah Hayatullah Khan í samtali við Reuters. Árið 2007 verði það blóðugasta frá því að erlent herlið réðst inn í landið árið 2001 og hrakti talibana frá völdum. Tvö þúsund sjálfsmorðsárásarmenn séu reiðubúnir til að láta til sín taka um leið og snjóa leysir í landinu en það séu aðeins 40 prósent af þeim sem vilji fórna lífi sínu fyrir málstaðinn.

Árið 2006 var það blóðugasta frá innrás bandamanna árið 2001 en talið er að um fjögur þúsund manns hafi fallið í landinu. Hershöfðingjar sem starfað hafa í Afganistan segja nauðsynlegt að kalla til fleiri hermenn til þess að kveða niður uppreisn talibana en hingað til hafa Bandaríkjamenn, Bretar og Pólverjar einir lofað meiri mannskap.