Sarkozy með nauma forystu í Frakklandi

Spennan magnast fyrir forsetakosningar í Frakklandi en Nicolas Sarkozy, frambjóðandi hægrimanna hefur nú afmáð forskot Segolene Royal sem er frambjóðandi sósíalista. Í byrjun árs leit allt út fyrir að Royal mundi leiða sósíalista til sigurs í kosningunum, henni skrikaði vart fótur í orðaskaki við sé reyndari pólitíkusa.

Sarkozy, sem er töluvert umdeildur, sérstaklega vegna viðbragða sinna sem innanríkisráðherra við uppþotum innflytjenda á síðasta ári, hefur nú heldur betur náð vopnum sínum og nýtir sér óspart vinsældir Jacques Chirac þegar hann varar kjósendur við því að setja stöðugleika og árangur í óvissu með því að veðja á nýjan hest. Fyrri umferð kosninganna fer fram í apríl og sú síðari í maí nái ekkert framboð hreinum meirihluta. Samkvæmt könnunum núna mundi Sarkozy sigra Royal í slíkum kosningum með 54 prósentum atkvæða.