Ég er Wenger hinn mikli

Sir Alex Ferguson var ekki lengi að svara fyrir sig í dag þegar hann frétti að Arsene Wenger hefði kallað lið Manchester United "70 mínútna lið." Mathieu Flamini sagði eftir leik Arsenal og United að Wenger hafi notað þessi orð til að lýsa liði United.

Arsenal var lengst af undir 1-0 á heimavelli sínum gegn United á dögunum en heimamönnum tókst að stela sigrinum 2-1 í lokin. Flamini sagði Wenger hafa tjáð sínum mönnum að United væri ekki jafn sterkt á síðustu 20 mínútum leikja og hafa þessi orð vakið litla kátínu hjá Sir Alex Ferguson.

"Ég er ekki viss um hvað Wenger var að meina með þessum ummælum sínum. Kannski var hann að reyna að gera mikið úr sjálfum sér eins og svo oft áður - "Ég er hinn mikli Wenger"! Þegar tölfræðin er skoðuð sést að þessar fullyrðingar eru bull og mér finnst ómerkilegt að halda svona löguðu fram. Það má vel vera að við höfum slakað aðeins of mikið á í lokin og misst einbeitingu. Það hefur svo sem komið fyrir áður, en hvað hefði Wenger sagt ef við hefðum unnið 1-0?" sagði Ferguson.