Skiptar skoðanir á áformum Platini

Sir Alex Ferguson, stjóri Manchester United, hefur skorað á nýkjörinn forseta evrópska knattspyrnusambandsins að gera ekki breytingar á keppnisfyrirkomulagi í Meistaradeildinni. Michel Platini boðaði breytingar í stefnuskrá sinni fyrir forsetakosningarnar hjá UEFA og nú er útlit fyrir að þær gætu náð fram að ganga í kjölfar sigurs Platini. Stjórar í ensku úrvalsdeildinni taka misvel í hugmyndir Frakkans.

Frakkinn vildi meðal annars fækka hámarksfjölda liða frá hverri þjóð í Meistaradeildinni úr fjórum í þrjú. "Aðdráttarafl Meistaradeildarinnar er að mestu fólgið í því þegar risaliðin frá Spáni, Ítalíu og Englandi mæta hvert öðru. Það hafa kannski verið full margir leikir á dagskrá í keppninni í gegn um tíðina, en ég sé ekki aðra leið út úr þessum tillögum en að fækka leikjum eða gefa öðrum löndum tvö sæti í stað eins," sagði Ferguson.

Sam Allardyce hjá Bolton segist sjá bæði jákvæðar og neikvæðar hliðar á því að Platini sé orðinn forseti FIFA. "Það er gott að sjá knattspyrnumann kominn í forsetastólinn, en ef hugmyndir hans um að fækka liðum inn í Meistaradeildina ná fram að ganga - á lið eins og við ekki nokkurn einasta möguleika á að komast í hana og það skemmir fyrir úrvalsdeildinni," sagði Allardyce.

Gareth Southgate, stjóri Middlesbrough, segir tillögur Platini um að koma á launaþaki í Evrópuboltanum vera aðdáunarverðar og áhugaverðar, en er svartsýnn á að þær nái fram að ganga. "Launaþak myndi gera deildina miklu meira spennandi og því væri ég sannarlega fylgjandi slíku - en í nútíma knattspyrnu held ég að félögin myndu alltaf finna einhverjar leiðir til að fara framhjá slíkum reglum."