Risakanínur til bjargar Norður-Kóreu

Þýskur eldri borgari sem stríðól kanínuna sína þannig að hún náði 10,5 kílóa þyngd fékk á dögunum athyglisvert atvinnutilboð frá Asíu. Hann á að rækta risakanínur sem duga átta manns í mat og þannig bjarga Norður-Kóreu frá hungursneyð. Eina vandamálið er að kanínurnar éta óhemju mikið sjálfar til að ná þessari stærð.

Karl Szmolinsky ræktar þýskar grákanínur, sem eru eitt stærsta kanínukyn í heimi. Hann fékk nýverið verðlaun fyrir gæludýrið sitt Róbert sem er með honum á myndinni. Róbert er stærsta kanína Þýskalands.

Fljótlega eftir það kom til hans sendifulltrúi frá norðurkóreska sendiráðinu í Berlín og keypti af honum átta kvenkyns kanínur og fjóra kanínukarla. Szmolinsky, sem verður 68 ára í febrúar fer utan til Pyongyang í apríl til að hjálpa til við að setja á fót kynbótabú.

NI_MPU('middle');