Rúmið hrundi í miðri fæðingu

Þriggja barna móðir hefur lagt fram kvörtun til fæðingardeildar í Leeds eftir að rúm sem hún lá í hrundi í miðjum klíðum - í miðjum hríðum. Linda Makin segir að hún, barnið hennar nýfætt og ljósmóðirin hafi legið "í kássu" á gólfinu eftir að rúmið brast.

Móðirin segir það hafa verið hræðilega lífsreynslu þegar fótagaflinn hrundi undan rúminu hennar svo það sporðreistist rétt um það bil sem barnið var við það að fæðast. Ljósmóðirin greip barnið og faðirinn greip utan um móðurina og hélt henni á lofti þannig að hún lenti ekki ofan á ljósmóðurinni og barninu.

Barnið mun ekki hafa borið skaða af og móðirin ekki heldur.