Peretz hugsanlega á förum

Ísraelsk sjónvarpsstöð hefur eftir heimildum á skrifstofu forsætisráðherrans Olmerts að Amir Peretz, varnarmálaráðherra Ísraels verði senn færður til í starfi og ef hann þiggi ekki annað ráðherraembætti þá verði hann rekinn. Skrifstofa Olmerts segir sögusagnirnar hins vegar tilhæfulausar.

Peretz er leiðtogi verkamannaflokksins og tók hann sæti í stjórn Olmerts í maí. Hann hefur lítinn bakgrunn í varnarmálum enda snerist kosningabarátta hans um velferðarmál, að sögn ísraelska blaðsins Haaretz. Hann hefur sætt mikilli gagnrýni, sérstaklega eftir árangurslitlar hernaðaraðgerðir gegn Hisbollah í sumar.

Verkamannaflokkurinn er aðalsamstarfsaðili Kadima-flokks Olmerts og ef upp kemur ósætti milli formannanna er hætta á að slitni upp úr stjórnarsamstarfinu með tilheyrandi stjórnarkreppu og jafnvel nýjum kosningum.