Krefjast bóta frá Þýskalandi

Þúsundir afkomenda gyðinga, sem lifðu af dvöl í útrýmingarbúðum nasista á tímum seinni heimsstyrjaldarinnar, ætla í dag að hefja mál gegn Þýskalandi, sem háð verður fyrir dómstólum í Ísrael. Þeir krefjast skaðabóta fyrir að hafa alist upp í ótta og þunglyndi og vilja að þýsk stjórnvöld borgi fyrir meðferð þeirra hjá geðlæknum.

Málshefjendur eru samtals um fjögur þúsund, allt saman börn fórnarlamba helfararinnar. Þjáningar foreldranna hafa komið niður á börnunum, sem eiga erfitt með að lifa daglegu lífi vegna sálartjóns og geta mörg hver ekki stundað reglulega vinnu.