Palestínskum föngum sleppt

Ísraelsk stjórnvöld munu sleppa 250 palestínskum föngum úr fangelsi á föstudaginn. Ehud Olmert, forsætisráðherra Ísraels, greindi Mahmoud Abbas, forseta Palestínu, frá þessu á fundi þeirra í Jerúsalem í gær.

Flestir þeirra sem fá frelsið eru liðsmenn Fatah og afgangurinn frá minni hópum. Engum Hamas-liðum verður sleppt.

Ísraelsk stjórnvöld hafa undanfarið unnið að því að styrkja stöðu Abbas og Fatah-hreyfingar hans í Palestínu eftir að Hamas-samtökin lögðu undir sig Gaza-ströndina. Í kjölfarið myndaði Abbas nýja ríkisstjórn án aðkomu Hamas.

Olmert og Abbas munu funda á ný eftir tvær vikur.