Rússar kvarta vegna óeirðanna í Tallin

Vladimir Pútín, forseti Rússlands, kvartaði í gær við Angelu Merkel, kanslara Þýskalands, sem fer með forsæti í Evrópusambandinu, yfir framgöngu eistneskra stjórnvalda við að bæla niður mótmæli Eista af rússneskum uppruna í Tallin, höfuðborg Eistlands, síðustu daga. Rússar fullyrða að maður sem lést í óeirðunum hafi verið Rússi, búsettur í Eistlandi.

Eistnesk stjórnvöld bjuggu sig í gær undir þriðju nóttina af óeirðum. Um sex hundruð manns voru handteknir og um hundrað slösuðust þegar óeirðir brutust út í borginni í fyrrakvöld, annað kvöldið í röð. Alls hafa um þúsund manns verið handteknir, á annað hundrað hafa slasast og einn hefur látist.

Átökin blossuðu upp eftir að eistnesk stjórnvöld fjarlægðu sovéskan minnisvarða um sigur Rauða hersins yfir nasistum, bronsstyttu af hermanni sem staðið hefur í hálfa öld, úr miðborginni. Undir styttunni voru nokkrir hermenn grafnir, og stóð til að færa líkamsleifar þeirra. Innan við þriðjungur íbúa landsins er af rússneskum uppruna, og eru þeir um áttatíu prósent mótmælendanna. Aðrir Eistar telja flestir minnisvarðann minna á áralanga kúgun Sovétríkjanna yfir Eistum.

Drukkin ungmenni hafa kastað grjóti og eldsprengjum í vígbúna lögreglumenn, brotið og bramlað flest sem á vegi þeirra verður og látið greipar sópa í verslunum í borginni.

Til að sporna við mótmælunum lagði eistneska ríkisstjórnin í gær bann við áfengissölu fram yfir mánaðamót. Þótt það hafi dregið úr ölvun, kynti það heldur undir reiði flestra mótmælenda. Þeir af rússneskum uppruna reiddust þar sem þeir töldu bannið lýsa því viðhorfi stjórnvalda að það væri aðeins ölvun, en ekki reiði þeirra sem væri valdur óeirðanna.

Margir ungir Eistar urðu einnig bálvondir út í Rússana fyrir að hafa orðið til þess að þeir gætu ekki haft áfengi um hönd við skemmtanir í gærkvöldi. Þá reistu stjórnvöld tjald yfir torgið þar sem styttan hafði staðið, og sendu hundruð þúsunda símskilaboða á landsmenn þar sem þeir voru hvattir til að halda sig innandyra.