Logi: Jónas var efstur á óskalistanum

Logi Ólafsson, þjálfari KR, segir að Jónas Guðni Sævarsson passi vel inn í áætlanir sínar fyrir lið KR-inga og leik liðsins á næstu leiktíð.

„Það hafa horfið úr okkar röðum miðjumenn að undanförnu og settum við Jónas efstan á okkar óskalista,“ sagði Logi á blaðamannafundi í dag þar sem Jónas Guðni var kynntur til sögunnar sem leikmaður KR.

„Ég hef áður sagt að við viljum gera tilraun til þess að leika samkvæmt 4-4-2 leikkerfinu og lítum sérstaklega til Jónasar í því sambandi. Við þurfum menn með mikla hlaupagetu, menn sem geta haldið boltanum hjá sér, varist og reynt að hitta á menn í röndóttu treyjunum. Við teljum Jónas mjög hæfan til þeirra verka.“ 

Logi sagði enn fremur að það væri enginn hæfari en Rúnar Kristinsson til að hjálpa Jónasi til að bæta sig sem knattspyrnumann en Rúnar mun sjá um einstaklingsþjálfun miðvallar- og sóknarleikmanna KR-liðsins. 

Hann vildi ekki gefa upp markmið liðsins fyrir næstu leiktíð en sagði engu að síður að KR eigi að vera í baráttunni í efri hluta deildarinnar.

„Við erum ásáttir um að vera ekki með neinar stórar yfirlýsingar. Við vitum enga betri aðferð en að undirbúa okkur vel fyrir næsta mót og sú aðferð mun vonandi skila liðinu í baráttuna í efri hluta deildarinnar.“ 

Aðspurður sagði hann að kaupverðið væri ekki uppgefið en Jónas átti eftir eitt ár af samningi sínum við Keflavík. „Ég get þó sagt það hér að KR-ingar eiga góða menn að í þjóðfélaginu.“