Krýndur ljótasti hundur heims

Hinn tveggja ára gamli Elwood var á föstudag krýndur heimsins ljótasti hundur, í keppni í Kaliforníu.

Elwood er blanda af kínverskri hundategund og Chihuahua og þykir minna á vísindaskáldsagnapersónurnar Yoda og ET. Hann er svartur og hárlaus, fyrir utan hvítan hanakamp.

Fyrir utan titilinn hlutu Elwood og eigandi hans, Karen Quigley, ríflega 60.000 krónur í verðlaun.

„Mér finnst hann það sætasta í heiminum,“ segir Quigley. Hún bjargaði honum frá hundaræktanda sem ætlaði að svæfa hann.

„Honum þótti hann of ljótur til að hann gæti selt hann,“ segir Quigley.