Ísabella Henríetta Ingiríður Margrét

Danmörk, AP Ísabella Henríetta Ingiríður Margrét var nafnið sem dóttir Friðriks krónprins af Danmörku og Maríu Elísabetar krónprinsessu var gefið er hún var skírð við hátíðlega athöfn í kapellu Fredensborgarhallar á Sjálandi í gær.

Prinsessan unga, sem fæddist þann 21. apríl, er annað barn krónsprinshjónanna. Hún er nú þriðja í ríkiserfðaröðinni á eftir föður sínum og eldri bróður, hinum tveggja ára gamla Kristjáni prins.

Látin móðir Maríu Elísabetar hét Henríetta, móðuramma Friðriks hét Ingiríður og Margrétarnafnið er í höfuðið á ömmunni, Margréti Þórhildi drottningu. María Elísabet tjáði fréttamönnum að þau hjónin hefðu síðan komið sér saman um nafnið Ísabellu, sem ekki er í höfuðið á neinum.

Skírnarathöfninni var sjónvarpað beint í Danmörku. Mikill mannfjöldi safnaðist saman við kapelluna til að hylla fjölskylduna ungu.