Geðheilsa ekki könnuð þegar veitt er skotvopnaleyfi

Geðheilsa manna er ekki könnuð þegar veitt er skotvopnaleyfi á Íslandi. Skilyrði fyrir slíku leyfi eru mjög svipuð á Íslandi og í Finnlandi. Tæplega þrettán þúsund og sjöhundruð einstaklingar eru með skotvopnaleyfi hér á landi.

Fólk var slegið óhug þegar fréttist af því í gær að í nágrannalandi okkar Finnlandi hefði átján ára piltur náð að skjóta átta til bana og særa fleiri á skömmum tíma.

Þessi ungi maður hefði ekki fengið byssuleyfi á Íslandi því hér þarf fólk að hafa náð tvítugu til að fá skotvopnaleyfi. Að flestu leyti er þó ámóta löggjöf og skilyrði fyrir skotvopnaeign á Íslandi og hinum Norðurlöndunum, að sögn Snorra Sigurjónssonar, lögreglufulltrúa hjá Ríkislögreglustjóra.

Hér, eins og í Finnlandi, þurfa menn að sýna fram á hreint sakarvottorð. Hér þurfa allir hér að sækja þriggja daga námskeið og framvísa læknisvottorði. Það er hins vegar ekkert sem kemur í veg fyrir að andlega vanheilir einstaklingar fái byssuleyfi því menn þreyta ekkert sálrænt próf.

Hins vegar eru ströng skilyrði fyrir skammbyssuleyfum hér en finnski fjöldamorðinginn beitti slíku vopni í gær. Birgir Ármannsson, formaður allsherjarnefndar og þingmaður Sjálfstæðisflokksins, sagði í samtali við fréttastofu Stöðvar 2 í morgun að vissulega væri nauðsynlegt að hafa ströng skilyrði fyrir byssuleyfum en hann efast um að hertar reglur myndu útiloka hættu á hörmulegum atburðum eins og þeim sem varð í Finnlandi í gær.