Danskir smábankar sakaðir um samráð

Sjö danskir héraðsbankar eru eru sakaðir um ólöglegt samráð allar götur síðan 1978. Ítarleg rannsókn samkeppnisyfirvalda hefur staðið síðustu tíu mánuði og er að ljúka. Frá þessu er greint í Berlingske tidende í dag.

Á þeim tíma hefur rannsóknarnefnd samkeppnismála grafið sig í gegnum fjallháa bunka af gögnum frá bönkunum og á morgun verða niðurstöður rannsóknarinnar kynntar fyrir samkeppnisráði. Að líkindum verða bankarnir sjö þá kærðir til lögreglu.

Ole Kühnel, bankastjóri Vordingborg Bank, eins bankanna sjö, segir að ef bankarnir verði kærðir fyrir samráðið jafngildi það dauðadómi fyrir þá. Hann segir að samvinna á milli smábanka sé þeim lífsnauðsynleg í samkeppnisumhverfi og vegna flókinna laga um starfsemi slíkra stofnanna.

Hinir bankarnir sem um ræðir eru Lokalbanken á Norður-Sjálandi, Skælskør Bank, Diba Bank í Næstved, Lollands Bank, Møns Bank og Totalbanken á Fjóni.