Ástralski talibaninn játaði allar sakir

„Ástralski talibaninn" David Hicks, sem hefur setið í fimm ár í fangelsinu í Guantanamo á Kúbu eftir að hafa verið handtekinn í Afganistan, játaði á sig allar sakir í réttarhöldum í fangelsinu í gær.

Hicks var sakaður um að hafa barist með talibönum, sótt þjálfunarbúðir al-Kaída og aðstoðað við hryðjuverk. Nú mun Hicks að líkindum fá að fara heim til Ástralíu og sitja af sér fangelsisdóm þar. Hicks er fyrsti Guantanamo-fanginn sem mætir fyrir dóm samkvæmt nýjum reglum Bandaríkjastjórnar um Guantanamo. Þar sem hann játaði sakir sínar fá lögmenn hans tækifæri til að semja við saksóknara um refsingu hans og fá til þess frest þar til í kvöld. Þyngsti mögulegi dómur sem hann getur hlotið er lífstíðarfangelsi, en líklegt þykir að dómurinn verði nokkuð vægari.

Réttarhöld eru að hefjast yfir tveimur föngum til, Kanadamanninum Omar Khadr og Jemenanum Salim Ahmed Hamdan. Bandaríkjamenn hafa sagst ætla að rétta yfir um 80 af 385 föngum sem sitja í Guantanamo samkvæmt nýju reglunum.

Mannréttindasamtökin Amensty International hafa gagnrýnt reglur Bandaríkjastjórnar og réttarhöldin harðlega, segja þau subbulega sýndarmennsku og hafa krafist þess að réttað verði yfir mönnunum í Bandríkjunum af almennum dómstólum.