Þjóðvarðliðar stilla til friðar í Rio

Alríkisstjórn Brasilíu segist ætla að senda þjóðvarðsveitir herlögreglunnar til Rio de Janeiro ríkis til þess að hafa hemil á götuofbeldi milli glæpagengja sem hafi orðið 20 manns að bana í borginni undanfarna daga. Ríkisstjórin Sergio Cabral segist líka ætla að biðja um aukinn stuðning frá hernum.

Sjö manns brunnu lifandi inni í strætisvagni og tveir lögreglumenn voru skotnir til bana á mánudaginn. Forsetinn Luiz Inacio Lula da Silva lýsir ofbeldinu sem hryðjuverkum og segir að brasilíska stjórnin þurfi að taka á vandamálinu.

Skiljanlega er yfirvöldum mikið í mun að róa ástandið í borginni þar sem Rio er vinsæll ferðamannastaður, sérstaklega á meðan á kjötkveðjuhátíðinni stendur á útmánuðum. Þá fara fram mikil viðskipti í borginni og þar verður leiðtogafundur Mercosur viðskiptabandalags Suður-Ameríkuríkja haldinn síðar í þessum mánuði. Þá verða Ameríkuleikarnir haldnir þar í júlí.