Beckham á leið frá Real Madrid

Predrag Mijatovic, íþróttastjóri spænska stórliðsins Real Madrid, greindi frá því í dag í ítölsku sjónvarpi að samningurinn við enska knattspyrnumanninn David Beckham yrði ekki endurnýjaður en hann rennur út í vor. Þetta þýðir því að þessi skærasta stjarna knattspyrnunnar er á leið frá félaginu. Beckham hefur leikið með Real Madrid frá árinu 2003 en í vetur hefur hann ekki verið í náðinni hjá þjálfara liðsins, Ítalanum Fabio Capello. Beckham hefur verið orðaður við fjölda liða í heimalandinu, Bretlandi, og Los Angeles Galaxy í Bandaríkjunum.