Ætlar sér að efla rétt kvenna

Kona sór í gær embættiseið forseta Indlands í fyrsta skipti í sögunni. Í setningarræðu sinni sagði Pratibha Patil að forgangsmál hennar yrðu að taka á misrétti gegn konum á Indlandi.

Þrátt fyrir að þetta sé almennt álitið mikilvægt skref fyrir kvenréttindabaráttuna á Indlandi hefur einnig borið á gagnrýni í garð Patil frá konum sem segja hana ekki þess umkomna að vera leiðtogi þeirra. „Hún var valin vegna hollustu sinnar,“ sagði Madhu Kishwar, ritstjóri Manushi, tímarits um femínisma og mannréttindi, og vísar þar til alkunnrar tryggðar Patil við hina valdamiklu Nehru-Gandi-fjölskyldu. Patil var handvalin í embættið af Soniu Gandhi, leiðtoga ráðandi flokksins á Indlandi, Þingflokksins, og vann öruggan sigur á andstæðingi sínum þar sem hún naut stuðnings flokksins og pólitískra samherja hans.

Þrátt fyrir að konur hafi setið í valdamiklum embættum á Indlandi, á borð vid Gandhi og tengdamóður hennar, Indiru Gandhi sem var kjörin forsætisráðherra 1966, er misrétti gagnvart konum útbreitt á Indlandi.

Dætur eru oft álitnar byrðar á fjölskyldum sínum þar sem samkvæmt hefð borga fjölskyldur þeirra með þeim háan heimanmund. Algengt er að menntun þeirra sé ábótavant og margar fái ekki læknisþjónustu þegar þær veikjast.