Demókratar taka við stjórnvelinum á Capitol-hæð

Nýkjörið Bandaríkjaþing kemur saman í fyrsta sinn í dag og þá verða það demókratar sem stjórna bæði fulltrúadeildinni og öldungadeildinni. Eftir þingkosningar í nóvemer er Demókrataflokkurinn í fyrsta sinn í tólf ár með meirihluta í báðum deildum og ljóst þykir að erfiðara verður fyrir stjórn Bush Bandaríkjaforseta að koma málum í gegnum þingið.

Ífyrsta sinn í sögu Bandaríkjaþings verður kona þingforseti í fulltrúadeildinni. Það er Nancy Pelosi, þingmaður demókrata í Kaliforníu, en með því að taka við embættinu verður hún þriðja valdamesta manneskjan í Bandaríkjunum á eftir Bush Bandaríkjaforseta og Cheney varaforseta.

Hún hefur heitið því að skera upp herör gegn spillingu og hagsmunagæslu á þinginu en auk þess ætla demókratar að beita sér fyrir því að hækka lágmarkslaun ásamt því að reyna að hrinda banni Bandaríkjastjórnar við stofnfrumurannsóknum.

Þá er búist við því að demókratar láti til sín taka í tengslum við stríðið í Írak og yfirheyrsluaðferðir Bandaríkjastjórnar á meintum hryðjuverkamönnum.