Spá því að árið 2007 verði það heitasta frá upphafi mælinga

Breskir veðurfræðingar spá því að árið 2007 verði það heitasta í heiminum frá því að mælingar hófust. Samkvæmt útreikningum eru 60 prósenta líkur á að árið verði jafnheitt eða heitara en metárið 1998.

Er það meðal annars vegna þess að veðurfyrirbrigðið El Nino muni hafa lengur áhrif á árinu við Suður-Ameríku og Austur-Afríku en undanfarin ár. Samkvæmt rannsókn hefur El Nino einnig áhrif á veðurfar annars staðar í heiminum og þrýstir hitanum upp. Þá muni útblástur gróðurhúsalofttegunda af mannavöldum einnig auka hitann á árinu.

Alþjóðlega veðurfræðistofnunin birti í desemeber bráðabirgðaniðurstöður sem sýna að hiti á jörðinni hafi hækkað um 0,42 gráður á síðasta ári miðað við meðaltal áranna 1961-1990. Það þýðir að árið 2006 var það sjötta heitasta í heiminum frá því að mælingar hófust.