Lampard með eigin sjónvarpsstöð

Miðjumaðurinn sterki hjá Chelsea, Frank Lampard, hefur skrifað undir samning við breska símafélagið Orange um stofnun Frank TV. Frank TV er sjónvarpsstöð, algjörlega helguð Lampard, sem viðskiptavinir Orange hafa einir aðgang að en þar verður sjónvarpað áður óséðu efni sem Lampard hefur verið að taka upp undanfarin tvö tímabil.

Efnið sem Lampard hefur tekið upp er frá æfingasvæði Chelsea, heimili hans og svo framvegis og geta Orange notendur hlaðið efninu niður í símann sinn.

Lampard segist spenntur fyrir verkefninu.

"Það er ekki á hverjum degi sem heil sjónvarpsstöð er helguð manni þannig að ég er mjög ánægður. Ég vona bara að fólki líki vel við það sem ég hef fram að færa," sagði Lampard.

Ef hann sýnir jafn lipra takta fyrir framan myndavélarnar eins og hann gerir á knattspyrnuvellinum þarf enginn að hafa áhyggjur af því.