Hættumat sett á efsta stig - Brown hvetur Breta til að standa saman

Hættumat vegna hryðjuverkaógna hefur verið sett á hæsta stig í Bretlandi. Ástandið er metið alvarlegt og þýðir það að yfirvöld telja hryðjuverkaárás yfirvofandi. Frá þesstu var greint rétt fyrir hálf átta í kvöld. Öryggisnefnd bresku ríkisstjórnarinnar, COBRA, hefur setið á fundi í dag undir forystu Gordons Brown forsætisráðherra og þar var ákveðið að setja hættumatið á efsta stig.

Þessi ákvörðun kemur í kjölfar þess að komið var í veg fyrir bílsprengjuárásir í miðborg Lundúna í gær og árásarinnar sem gerð var á flugvellinum í Glasgow í dag.

Forsætisráðherrann flutty stutta yfirlýsingu eftir COBRA fundinn, en á fundinum var meðal annars rætt um að láta hermenn gæta flugvalla í landinu. „Frumskylda ríkisstjórnarinnar er að viðhalda öryggi breskra þegna. Því er það rétt ákvörðun að hækka viðvörunarstigið á lugvöllum og á öðrum fjölförnum stöðum. Ég biðla til allra breskra borgara að vera á varðbergi og veita lögreglunni stuðning. Ég veit að Bretar munu standa saman, úrræðagóðir og sterkir."