Hryðjuverkaárás á Glasgow flugvelli

Logandi bifreið var ekið inn í aðal flugstöðina í Glasgow í dag. Töluverðar skemmdir urðu og einhver slys á fólki. Hryðjuverk segja bresk yfirvöld. Ökumaður bílsins og farþegi hafa verið handteknir.

Frásagnir vitna af atburðinum eru misvísandi en vitað er að tveir menn voru í Cheeroke jeppabifreið sem ekið var á miklum hraða inn í flugstöðvarbygginguna. Vitni segja að logað hafi undir bifreiðinni þar sem henni var ekið á glerhurð og síðan hafi logarnir læst sig í henni allri. Tveir menn af asískum ættum skriðu út úr henni, og að sögn vitna logaði í öðrum manninum. Til átaka mun hafa komið milli þeirra, lögreglumanna og farþega. Báðir voru þeir handteknir. Greiðlega gekk að slökkva eldinn. Engar fréttir hafa borist af alvarlegum slysum á fólki.

Flugvöllurinn er sá sjötti stærsti á Bretlandseyjum en þar fara nærri níu milljón farþegar um á ári. Þangað flýgur Icelandir og er ferð fyrirhuguð í fyrramálið. Vel á þriðja hundrað flugvélar fara þar um völlinn á degi hverjum og flogið þaðan til níutíu áfangastaða. Völlurinn var þegar rýmdur og öllu flugi til og frá honum aflýst.

Frá fyrstu mínútu benti allt til þess að um hryðjuverkaárás væri að ræða og síðdegis staðfestu heimildarmenn við Sky-fréttastöðina að bresk yfirvöld litu svo á. Gordon Brown, forsætisráðherra Breta, stýriði fundi í öryggisráði ríkisstjórnarinnar síðdegis og eftir hann var ákveðið að herða öryggisgæslu á flugvöllum á Bretlandseyjum. Bandaríkjamenn hafa gert slíkt hið sama á flugvöllum þar í landi.

Mikil spenna hefur skapast á Bretlandseyjum síðan í gær. Þá var komið í veg fyrir blóðbað þegar tvær sprengjur fundust í tveimur Benz bifreiðum í miðborg Lundúna og þær gerðar óvirkar. Ekki er vitað hvort árásin í dag tengist atburðunum í gær.

Öryggisgæsla var mikil í borginni í dag þegar árleg gleðiganga samkynhneigðra var haldin. Ekki verður hún minni á Wembley leikvanginum á morgun þar sen verða minningartónleikar um Díönu prinsessu. Þess fyrir utan beinast augu margra íþróttaunnenda að Wimbledon tennismótinu sem stendur nú sem hæst.