Hryðjuverkaógnin snýr aftur

Lögregla aftengdi í gær sprengju sem komið hafði verið fyrir í bíl í mannmörgu leikhúshverfi Lundúnaborgar, sem gæti hafa drepið hundruð manna. Sprengjan fannst þegar áhöfn sjúkrabíls sá reyk koma úr Mercedes Benz-bifreið, sem í ljós kom að var fyllt með banvænni blöndu af bensíni, própangasi og nöglum, að því er lögregluyfirvöld greindu frá.

Sprengjan, sem fannst í bíl sem lagt hafði verið við Heymarket nærri Piccadilly Circus, var að sögn Peters Clarke, yfirmanns bresku hryðjuverkavarnalögreglunnar, nægilega öflug til að valda „verulegu manntjóni“, jafnvel dauða hundruða manna.

Uppgötvunin vakti upp minningar um hryðjuverkasprengingarnar í borginni 7. júlí 2005, sem urðu 52 manns að bana um borð í þremur neðanjarðarlestum og strætisvagni, og svipaða árás sem koma tókst í veg fyrir tveimur vikum síðar.

„Við stöndum nú frammi fyrir alvarlegri og stöðugri ógn við öryggi okkar frá alþjóðlegri hryðjuverkastarfsemi,“ sagði Jacqui Smith, nýr innanríkisráðherra Bretlands, eftir fund með æðstu mönnum almannavarna í landinu.

Ítarleg rannsókn á málinu stendur yfir en engar viðvaranir eða leyniþjónustuvísbendingar kváðu hafa komið fram fyrirfram um að tilræði af þessu tagi kynni að vera yfirvofandi.