Man. Utd. á eftir Deco og Richards?

Ensku slúðurblöðin greina frá því í morgun að Alex Ferguson ætli að fá þá Deco, leikmann Barcelona, og Micah Richards hjá Manchester City til Old Trafford á næstu leiktíð. Deco er sagður orðinn leiður á tilverunni í Katalóníu og vill nýja áskorun, en Richards yrði aðeins þriðji leikmaðurinn í sögunni til að fara frá Man. City yfir til erkifjendanna í Man. Utd.

Öll stærstu lið Englands eru sögð hafa áhuga á að fá hinn 18 ára gamla Richards í sínar raðir, sem hefur slegið í gegn á þessari leiktíð. Heimildamaður nátengdur leikmanninum segir hins vegar að það sé vilji fjölskyldu Richards að hann haldi sér í Norðvestur hluta Englands. Það þýðir að Richards mun ekki vera á leið til Chelsea, sem hefur helst verið orðað sem næsti áfangastaður hans.

Aðeins framherjinn Wyn Davies (1972) og markvörðurinn Tony Coton (1996) hafa farið frá Man. City til Man. Utd. frá árinu 1930.

Forráðamenn Barcelona eru sagðir viljugir á að láta Deco fara frá liðinu í sumar, sérstaklega ef um Manchester United er að ræða. Þannig gæti Deco virkað sem sterkur leikur í væntanlegu kapphlaupi um Cristiano Ronaldo í sumar.

Deco er verðlagður á 15 milljónir punda og Richards á um 20 milljónir punda.