Liðið hefur vantað herslumuninn

Íslenska knattspyrnulandsliðið hefur ekki unnið heimaleik undir stjórn Eyjólfs Sverrissonar og vann síðast leik í Laugardalnum í vináttulandsleik gegn Suður-Afríku 17. ágúst 2005.

Það hefur samt aldrei munað eins litlu og gegn spænsku stórstjörnunum í rigningunni á laugardagskvöldið. Íslenska liðið var manni fleiri í 70 mínútur og marki yfir í 46 mínútur en Eyjólfur þarf að bíða í að minnsta kosti fjóra daga eftir fyrsta sigri sínum á Laugardalsvellinum. Til að sigurinn komi þarf landsliðsþjálfarinn að finna leiðir til þess að verja forskot.

Jöfnunarmark Andrés Iniesta fjórum mínútum fyrir leikslok stal stigi fyrir spænska landsliðið og var í fjórða skiptið í röð þar sem íslenska liðið nær ekki að verja forskot sitt á heimavelli. Íslenska liðið hefur byrjað síðustu heimaleiki af miklum krafti og hefur skoraði fyrsta mark leiksins í þeim öllum en í stað þess að bæta við og tryggja sigurinn hefur liðið misst forystuna.

Íslenska liðið hefur verið yfir í 99 mínútur í þessum fjórum heimaleikjum en uppskeran er þrjú jafntefli og eitt tap.

Arnar Þór Viðarsson kom Íslandi yfir eftir aðeins 6 mínútur gegn Svíum 11. október í fyrra en það tók Svíana aðeins mínútu að jafna leikinn. Svíar skoruðu síðan sigurmarkið í leiknum þegar hálftími var eftir.

Brynjar Björn Gunnarsson kom Íslandi yfir eftir 27 mínútur gegn Liechtenstein 2. júní í sumar. Gestirnir úr Ölpunum tryggðu sér hinsvegar stig með því að jafna leikinn 42 mínútum síðar.

Gunnar Heiðar Þorvaldsson kom Íslandi í 1-0 eftir 65 mínútna leik í vináttuleik gegn Kanada 22. ágúst síðastliðinn en kanadíska liðið jafnaði leikinn tíu mínútum síðar. Í millitíðinni fékk íslenska landsliðið kjörin tækifæri til þess að auka muninn.

Mark Emils Hallfreðssonar gegn Spánverjum komst næst því að vera sigurmark því Spánverjar skoruðu ekki fyrr en 46 mínútum síðar og þegar aðeins fjórar mínútur voru til leiksloka. Líkt og í leiknum við Kanada fékk íslenska liðið góð tækifæri til að skora annað mark sitt og gera um leið út um leikinn.

Eyjólfur Sverrisson og lærisveinar hans fá annað tækifæri strax á miðvikudaginn til þess að landa heimasigri þegar Norður-Írar koma í heimsókn í Laugardalinn. Síðasti sigurleikur liðsins undir stjórn Eyjólfs kom einmitt á útivelli gegn Norður-Írum fyrir rúmu ári síðan.

Frá þeim tíma hefur liðið leikið átta leiki í röð án sigurs en haldi leikur liðsins áfram að batna eins og hann hefur gert í síðustu leikjum þá er full ástæða til bjartsýni um að strákarnir finni herslumuninn og takist að tryggja sér langþráðan sigur á Laugardalsvellinum.