Rússar hóta refsiaðgerðum

Litlu munaði að Rússar slitu stjórnmálasambandi við Eistland í gær eftir að eistnesk stjórnvöld höfðu látið taka niður umdeilt minnismerki frá Sovét-tímanum í Tallin, höfuðborg Eistlands. Óeirðir brutust út í Tallin þegar fólk safnaðist þar saman til að mótmæla flutningi minnismerkisins.

Á rússneska þinginu var einróma samþykkt að hvetja stjórnvöld til að beita Eistland efnahagslegum og stjórnmálalegum refsiaðgerðum. Forseti Eistlands hvatti hins vegar fólk til þess að sýna stillingu.

Einn maður lést og tugir særðust í óeirðunum, sem brutust út í Tallin þegar fólk safnaðist þar saman til að mótmæla flutningi minnismerkisins. Óeirðirnar eru þær verstu í landinu frá því að það sleit tengslin við Sovétríkin árið 1991. Um 300 manns voru handteknir.

Þriðjungur íbúa landsins er af rússneskum uppruna. Stærstur hluti þess hóps lítur svo á að minnismerkið hafi verið helgað rússneskum hermönnum sem fórnuðu lífi sínu í stríðinu gegn þýskum nasistum og frelsuðu Eystrasaltsríkin undan oki nasismans.

Eistneskumælandi íbúar landsins tengja minnismerkið hins vegar frekar við kúgunartímabil sovéskra yfirráða og vildu fá það burt úr miðbænum.