Þrælahald í Kína hneykslar þjóðina

Kínversk stjórnvöld boða nú hertar aðgerðir til að taka á þrælkun í múrsteinaverksmiðjum í sveitahéruðum landsins í kjölfar mikillar fjölmiðlaumfjöllunar um málið. Herferðin mun standa yfir í tvo mánuði og aðallega beinast að verksmiðjum og kolanámum.

Lögregla hefur ráðist inn í yfir 8.000 múrsteinabrennslur og kolanámur undanfarnar vikur í héruðunum Shanxi og Henan þar sem ástandið er talið verst. Nærri þúsund verkamönnum hefur verið bjargað úr ánauð, þar af eru tugir barna, og um 160 stjórnendur múrsteinabrennslna hafa verið handteknir.

Héraðsstjóri Shanxi, Yu Youjun hefur beðið fórnarlömb og fjölskyldur þeirra formlega afsökunar og varð þar með fyrstur ráðamanna til að viðurkenna ábyrgð í málinu.

Þetta hneykslismál, sem hefur verið helsta hitamálið í kínverskum fjölmiðlum undanfarnar vikur, hefur vakið alþjóðlega athygli á aðbúnaði verkafólks í Kína.

Eftir að fjölmiðlar höfðu birt fjöldann allan af frásögnum um þrælahald tóku stjórnvöld við sér og fyrir tveimur vikum birtist skýrsla á vef ríkisstjórnarinnar um að allt niður í átta ára gömul börn hafi verið barin og þvinguð til að vinna langan vinnudag án matar eða borgunar.