Blair kvaddur með lófataki og tárum

Nýr forsætisráðherra Bretlands, Gordon Brown, lofaði breytingum og nýrri forgangsröðun þegar hann tók við embætti í gær úr hendi Tonys Blair, sem hefur verið forsætisráðherra undanfarinn áratug meðan Brown hefur setið í fjármálaráðuneytinu.

Síðar um daginn barst tilkynning frá Kvartettinum svokallaða, sem Sameinuðu þjóðirnar, Evrópusambandið, Bandaríkin og Rússland mynda, um að Blair hefði verið skipaður formlegur erindreki Kvartettsins í friðarumleitunum á milli Ísraels- og Palestínumanna.

Blair var augljóslega hrærður þegar hann stóð í síðasta sinn fyrir svörum í fyrirspurnatíma forsætisráðherra í breska þinginu í gærmorgun. Í fyrirspurnatímanum sagðist Blair harma að breskir hermenn stæðu andspænis háska í Írak og Afganistan en baðst ekki afsökunar á ákvörðun sinni um að styðja hernaðaraðgerðir Bandaríkjanna.

Lokaorð Blair voru: „Ég óska öllum, vinum sem andstæðingum, hins besta. Og þannig er það. Endir.“ Þingheimur klappaði ákaft fyrir Blair og sumir felldu tár þegar hann yfirgaf þingsalinn til að halda til fundar við Elísabetu II Bretadrottningu sem hann afhenti afsagnarbréf sitt.

Forseti Bandaríkjanna, George W. Bush, sagði Blair hafa átt farsælan feril og að sagan myndi dæma hann mildilega. Í ummælum sem breska götublaðið The Sun birti í gær sagði Bush: „Ég hef heyrt að hann sé kallaður kjölturakki Bush. Hann er stærri en það.“

Talið er að Bush hafi átt veigamikinn þátt í að tryggja Blair stöðuna hjá Kvartettinum.

Afsögn Blairs bindur enda á samstarf sem spannar tæplega aldarfjórðung og hófst þegar hann og Brown voru kjörnir á þing árið 1983. Hinir ungu þingmenn deildu bæði skrifstofu og hugsjón um að hafa áhrif á örlög flokks síns.

Það hefur verið umtalað, en aldrei sannað, að félagarnir tveir hafi gert með sér samkomulag yfir kvöldverði árið 1994 þar sem Brown hét að bjóða sig ekki fram gegn Blair í leiðtogahlutverk Verkamannaflokksins eftir að þáverandi leiðtogi, John Smith, lést. Á móti á Blair að hafa heitið því að veita Brown víðtæk völd sem fjármálaráðherra og að víkja sem leiðtogi fyrir Brown eftir tiltekinn tíma.