Bjartsýni á lokun

Christopher Hill, aðalerindreki Bandaríkjastjórnar í málefnum Norður-Kóreu, sagði á föstudag að Norður-Kóreustjórn væri tilbúin til að hrinda hratt í framkvæmd fyrirheiti um að loka meginkjarnakljúf landsins, sem notaður hefur verið til að framleiða efni í kjarnorkusprengjur. Hill varaði þó við því að það yrði ekki auðvelt að „af-kjarnorkuvæða“ landið.

Hill talaði við fréttamenn í Seoul eftir að hann sneri aftur úr óvæntri heimsókn til Pyongyang, þar sem hann hitti norður-kóreska ráðamenn. Þrátt fyrir fyrirheit sem N-Kóreustjórn gaf í sex-velda-viðræðunum svonefndu árið 2003 hefur ekkert orðið úr efndum til þessa.