Hálf-eineggja og tvíkynja

Vísindamenn í Bandaríkjunum hafa upplýst um heimsins eina þekkta tilfelli „hálf-eineggja“ tvíbura, sem þannig eru til komnir að tvær sæðisfrumur frjóvguðu eitt egg sem síðan varð að tveimur fóstrum.

Í vísindaritinu Nature er greint frá því, að tvíburarnir séu þannig með nákvæmlega sama erfðaefnið frá móðurinni en aðeins til hálfs sama erfðaefni frá föðurnum.

Í um eitt prósent tilvika frjóvga tvær sæðisfrumur eitt egg, en flest fóstur sem verða til þannig lifa ekki af.

Tvíburarnir sem um ræðir voru getnir með náttúrulegum hætti. Að eitthvað óvenjulegt væri við þá uppgötvaðist bara í framhaldi af því að annar þeirra greindist tvíkynja, það er með vísi að bæði kven- og karlkynfærum. Hitt barnið er alveg karlkyns, af líkamseinkennum að dæma. En genapróf sýndi að báðir tvíburarnir eru genatæknilega blandaðir, það er bæði með frumur með kvenkyns X-litningum og karlkyns Y-litningum.