Smáþjóðir smærri utan ESB

„Noregur og Ísland eru smáþjóðir og munu alltaf verða smáþjóðir. En þær verða minni þegar þær eru fyrir utan Evrópusambandið,“ sagði Erik Moen, framkvæmdastjóri Alþjóðasambands hægriflokka (IDU), á hádegisverðarfundi Heimdallar og Evrópusamtakanna á dögunum þar sem rætt var um hvort hægrimenn ættu erindi í ESB.

Moen talaði á fundinum sem fulltrúi norska Hægri flokksins, sem er fylgjandi aðild Noregs að ESB. Ræddi hann meðal annars um aukið vægi ESB í alþjóðakerfinu og sagði sambandið vera í auknum mæli samnefnara Evrópu í huga fólks.

Að mati Moen er ólíklegt að spurning um aðild verði formlega tekin fyrir á næstunni í Noregi nema skoðanakannanir bendi til skýrs vilja almennings, þar sem dýrkeypt yrði ef aðild yrði hafnað í þriðja skiptið. Áður gerðist það árin 1972 og 1994.

Mikilvæg breyting hefur þó að sögn Moen orðið í Noregi á afstöðu til ESB, sem kemur fram í nýrri þverpólitískri þingskýrslu um mikilvægi ESB fyrir Noreg. Segir Moen að flestir stjórnmálaskýrendur hafi verið sammála um mikilvægi þessarar nýju skilgreiningar.

Moen kvaðst bjartsýnn á að Noregur yrði meðlimur í ESB fljótlega eftir árið 2010.