Upp komst um fimm mansalstilfelli

Aðeins fimm tilfelli mansals komu upp í tengslum við heimsmeistaramótið í knattspyrnu sem fram fór í Þýskalandi í fyrrasumar, samkvæmt skýrslu sem þýsk stjórnvöld sendu Evrópusambandinu og norska Dagblaðið greinir frá á fréttavef sínum.

Þessi niðurstaða gengur þvert á spádóma sem voru uppi um að 40.000 austur-evrópskar konur yrðu fluttar til landsins og falboðnar gestum mótsins. Sumir sem tóku dýpra í árinni töldu þennan fjölda eiga eftir að hlaupa á hundruðum þúsunda.

Skipuleggjendur mótsins voru ásamt þýskum stjórnvöldum harðlega gagnrýndir í þessari umræðu af ýmsum aðgerðarsinnum og fjölmiðlum í aðdraganda mótsins. Einna lengst gekk umboðsmaður jafnréttismála í Svíþjóð, Claes Borgström, sem vildi að sænska fótboltalandsliðið myndi sniðganga mótið vegna þessa máls.

Skýrsla sem hópur óháðra samtaka í Þýskalandi vann fyrir Evrópuráðið um mansal í tengslum við heimsmeistaramótið styður þessa niðurstöðu þýskra stjórnvalda. Í skýrslunni kom fram að ekki hefði orðið vart við aukið mansal og að ótti um slíkt hefði ekki verið á rökum reistur.

Talið er að í dag séu um fimm milljónir kvenna og barna þvingaðar til að starfa í kynlífsiðnaði, samkvæmt tölum frá Alþjóðavinnumálastofnuninni.