Dregið úr styrkjum til landtökumanna

Ehud Olmert, starfandi forsætisráðherra Ísraels, lýsti því yfir í dag að Kadima-flokkur hans og Sharons, forsætisráðherra, ætli að draga stórlega úr styrkjum til landtökumanna Gyðinga á Vesturbakkanum. Stutt er til þingkosninga í Ísrael og má búast við að þessi yfirlýsing komi sem sprengja í baráttuna.

Olmert ávarpaði stuðningsmenn sína á fundi í Tel Aviv í dag. Hann sagði að peningunum yrði frekar varið til uppbyggingar annarsstaðar í Ísrael á næstu árum. Áhersla yrði lögð á Jerúsalem, Negev-eyðimörkina og Galíleu í Norður-Ísrael.

Áður hafði Avi Dichter, einn helsti öryggisráðgjafi Olmerts, lýst því yfir að frekari brottflutningur landtökumanna frá Vesturbakkanum væri fyrirhugaður. Dichter sagðist þá vonast til að hægt yrði að ákvarða landamæri ríkisins þá.

Búast má við að yfirlýsing Olmerts í dag hleypi öllu í bál og brand nú þegar aðeins þrjár vikur eru til kosninga. Margir kjósendur hafa ekki fyrirgefið ríkisstjórninni fyrir að fyrirskipa brottflutning landtökumanna frá Gasaströndinni og hluta Vesturbakkans í fyrra.

Kadima flokkur Sharons forsætisráðherra og Olmerts mælist nú með mest fylgi í könnunum en óvíst hvaða áhrif yfirlýsingin í dag hafi á mælingar næstu daga.