Fangar enn pyntaðir í Írak

Fangar í Írak hafa ítrekað verið pyntaðir með raflosti og bareflum eftir að Abu Ghraib hneykslið komst í hámæli og Bandaríkjastjórn lofaði bót og betrum í fangelsum í Írak.

Þetta kemur fram í nýrri skýrslu frá Amnesty International, sem byggir á viðtölum við fanga. Að sögn fanganna voru pyntingar enn við lýði í fangelsum í Írak í fyrra og hafði þá lítið linnt eftir að upp komst um pyntingarnar í Abu Ghraib.

Talsmaður bandaríkjahers neitar þessu hins vegar með öllu og segir hvorki mannréttindasáttmála né íröksk lög brotin í fangelsum landsins.