Tveir látnir eftir tilræði í Bangkok

Nú er ljóst að tveir létust og yfir 20 særðust í röð sprengjuárása í Bangkok, höfuðborg Taílands, fyrr í dag. Sex sprengjur sprungu í borginni á um klukkustund um svipað leyti og fólk fór að safnast saman til að fagna nýju ári. Íhuga yfirvöld að fresta öllum slíkum fögnuðum af ótta við frekari árásir.

Enginn hefur lýst yfir ábyrgð á hendur sér vegna tilræðanna en grunur leikur á að andstæðingar herstjórarinnar á Taílandi, sem hrakti Thaksin Shinawatra forsætisráðherra frá völdum í september, hafi verið þarna á ferðinni.

Mestur skaðinn varð á strætisvagnabiðstöð nærri fjölförnustu gatnamótum borgarinnar en þar slösuðust vel á annan tug, þar af tveir alvarlega.