Ber ekki saman um aftöku Saddams

Embættismönnum ber ekki saman um hvenær Saddam Hussein verður tekinn af lífi. Íraska varnarmálaráðuneytið segir að dómnum verði ekki framfylgt næsta mánuðinn en af orðum íraska forsætisráðherrans, gæti það jafnvel orðið á morgun.

Nouri al-Maliki, forsætisráðherra Íraks, sagði í dag að aftöku Saddams Hússeins yrði ekki frestað, né yrði dómurinn endurskoðaður. Þetta eru fyrstu orð hans um málið eftir að kröfu Saddams um áfrýjun var hafnað. Þetta kemur heim og saman við það sem bandaríska forsetaembættið sagði í gærkvöldi: að Saddam yrði líklega líflátinn á næstu dögum, jafnvel á morgun.

Háttsettur embættismaður innan íraska varnarmálaráðuneytisins sagði hins vegar í morgun að Saddam yrði ekki líflátinn fyrr en eftir mánuð, í fyrsta lagi. Og það er ráðuneytið sem ræður því hvenær dómnum verður framfylgt, í það minnsta að nafninu til.

Lögfræðingur Saddams sagði í morgun að hann hefði kvatt bræður sína í gær á þann hátt að hann búist ekki við að sjá þá á ný. Þá sagði hann einnig að Saddam hefði verið færður í gæslu Íraka, eftir að hafa verið í haldi Bandaríkjamanna síðan hann var handtekinn. Þessu neitar varnarmálaráðuneytið einnig.