Erlent

Koparæði ógnar lífi lestarfarþega í Ástralíu

MYND/Kristján Sigurjónsson
Nýtt gullæði er skollið á í Ástralíu, sem ætti reyndar með réttu að kallast koparæði, sem ógnar lestarfarþegum á áströlskum teinum. Bíræfnir þjófar læðast inn á teinana í skjóli nætur og stela koparvírum sem hanga í loftinu fyrir ofan teinana, sem getur valdið alvarlegum lestarslysum. Lögreglan í Melbourne sá sig til neydda í síðustu viku að setja sérstaka koparvakt.

Fimm manns voru handteknir í þessari viku þar sem þeir höfðu laumast inn á lestarteina. 20 koparþjófnaðir hafa verið tilkynntir í Melbourne síðan í september. Lögreglan segir þjófnaðinn kjánalegan vegna þess að þjófarnir hafi ekki nema nokkur hundruð dollara upp úr krafsinu en það ógni lífum fjölda lestarfarþega.

Koparstuldur hefur einnig verið landlægur á Ítalíu upp á síðkastið, þar sem þjófarnir herja ekki eingöngu á lestirnar, heldur einnig á brýr og leita jafnvel fanga í kirkjugörðum.

Heimsmarkaðsverð náði hámarki í maí og hafði aldrei nokkurn tíma verið hærra. Það hefur hins vegar dalað skarpt síðan þá.

Mest lesið


Fleiri fréttir

Sjá meira


×

Mest lesið