Blaine reynir að losa sig úr snúningshringjum

Töframaðurinn David Blaine lét í gær festa sig í snúningshringi og hífa upp í 15 metra hæð yfir Times torgi í New York og mun hann hanga þar fram á föstudagsmorgun. Hann fékk ungan dreng til að ýta í hringina til að koma þeim á hreyfingu og rúllar hann viðstöðulaust eftir það.

Hann hefur frest fram á föstudagsmorgun til að losa sig og hefur verslanakeðjan Target heitið því að gefa fjölskyldum á vegum Hjálpræðishersins andvirði 35 þúsunda króna í úttekt til jólainnkaupa ef honum tekst að losa sig fyrir þann tíma.

Blaine hefur ekkert skjól fyrir veðri og vindum en ansi kalt er í New York borg um þessar mundir. Hann viðurkenndi aðspurður að hugsanlega væri hann örlítið brjálaður.