Palestínumenn frá Beit Hanoun lögsækja Ísraelsmenn

Þrjár palestínskar fjölskyldur, sem misstu 19 fjölskyldumeðlimi í sprengjuárás Ísraelshers á Beit Hanoun í liðinni viku, hyggjast lögsækja ísraelska ríkið og krefjast skaðabóta. Þetta kemur fram á vefsíðu ísraelska dagblaðsins Haaretz.

Rassan Kassem missti bróður sinn í árásinni og situr nú löngum stundum við sjúkrahúsrúm móður sinnar. Hann telur að kringumstæður þessarar árásar séu allt öðruvísi en í þeim málum þar sem Ísraelar hafa ítrekað hafnað fjárkröfum frá Palestínumönnum. "Það eru átök og stríð en í þetta skiptið viðurkennir Ísraelsher opinberlega að þarna var um mistök að ræða," segir hann í samtali við Haaretz.

"Yfirleitt hafa Ísraelar ekki viðurkennt kröfur Palestínumanna en þetta er mjög sérstakt mál. Það var engin orrusta á svæðinu og það höfðu ekki komið neinar eldflaugar frá okkur. Þetta fólk var drepið þar sem það svaf í rúmi sínu. Jafnvel Ísraelsmenn viðurkenndu að þetta er annað samhengi og hafa viðurkennt ábyrgð sína. Nú verða þeir að bæta okkur tjónið."