Guðfaðir korsísku mafíunnar látinn í bílslysi

Jean-Baptiste Colonna, "hinn eini sanni guðfaðir korsísku mafíunnar" samkvæmt rannsóknarskýrslu franska þingsins, lést í bílslysi á Korsíku í kvöld. Sterkur grunur lék á að hann tengdist heróínmsmyglhringnum French connection sem smyglaði gríðarlegu magni af heróíni til Bandaríkjanna á árunum 1937-1973 en hann var sýknaður eftir áfrýjun.

Hann var 67 ára að aldri og er jafnvel talið að hann hafi fengið hjartaáfall undir stýri. Þrátt fyrir að nafnið sé vel þekkt í Frakklandi og sérstaklega á Korsíku þekktu ekki margir hann í sjón, enda var þess gætt að vart næðust af honum myndir.

Colonna neitaði alla tíð að hafa tengst skipulagðri glæpastarfsemi á nokkurn hátt. Hann var dæmdur til 17 ára fangavistar árið 1978 en árið 1985 var málið látið niður falla vegna galla í dómsmeðferð og kom hann þá heim til Korsíku eftir að hafa farið huldu höfði í Suður-Ameríku.