Tveggja enn saknað eftir skipsskaða í Eystrasalti

Flutningaskipið Finnbirch er horfið í hafið við sænsku eyna Gotland eftir að hafa marað í hálfu kafi síðan um hálfsjö-leytið að íslenskum tíma. 4-5 metra ölduhæð og kafaldsbylur hafa hamlað björgunarstörfum en 12 af 14 manna áhöfn hefur þó verið bjargað um borð í þyrlu. Þyrlur og nærstödd skip leita enn að þeim tveimur sem saknað er.

150 metra langt skipið var hlaðið flutningagámum á leið frá Helsingfors til Árósa í Danmörku. Hugsanleg skýring er að farmurinn hafi flust til í ofsaveðri sem geisað hefur á svæðinu en töluverð slagsíða var komin á skipið þegar um klukkan þrjú að íslenskum tíma.

Um borð í skipinu eru samtals um 260 tonn af olíu en ekki hefur orðið vart við neinn olíuleka ennþá.