Botha, fyrrum forseti Suður-Afríku, látinn

P.W. Botha sem var forsætisráðherra Suður-Afríku 1978-1984 og forseti landsins 1984-1989 lést á heimili sínu í dag. Botha var harður stuðningsmaður aðskilnaðarstefnunnar þó svo að undir lok forsetatíðar sinnar hafi hann slakað lítillega á henni. Botha var 90 ára.

Stjórnmálamenn á Vesturlöndum gagnrýndu Botha harðlega fyrir aðferðir hans í embætti og gengu sumir svo langt að kalla hann einræðisherra og kynþáttahatara. Eftirmaður Botha, F.W. de Klerk, umbreytti öllum helstu stefnumálum Bothas, meðal annars með því að fella úr gildi lögin sem voru grunnurinn að aðskilnaðarstefnunni.

Botha neitaði alla tíð að biðjast afsökunar á aðskilnaðarstefnunni, sem og því að öryggissveitir hans hafi myrt rúmlega 2000 manns og haldið 25.000 Suður-Afríkumönnum án dóms og laga og pyntað bróðurpart þeirra. Hann sagðist ekki hafa haft hugmynd um pyntingarnar né önnur voðaverk öryggissveitanna og neitaði alfarið að játa á sig nokkra ábyrgð á þeim.