Ræktuðu lifrarfrumur úr stofnfrumum

Breskir vísindamenn við háskólann í Newcastle segjast hafa ræktað agnarsmáa búta af mennskum lifrarvef. Lifrarfrumurnar ræktuðu þeir úr stofnfrumum sem fengnar voru úr naflastrengjum. "Smálifrarnar" verða notaðar til lyfjatilrauna, þannig má koma í veg fyrir tilraunaslys eins og þegar sex sjúklingar urðu alvarlega veikir við lyfjatilraunir í Northwich Park.

Aðrir vísindamenn hafa hins vegar bent á að þar sem skýrsla um tilraunina hafi ekki enn verið gefin út sé ekki enn staðfest að manngerði lifrarvefurinn sé fullkomlega sambærilegur við ekta mennskan lifrarvef.

Vísindamennirnir sem standa að tilrauninni eru hins vegar fullir bjartsýni og segja að eftir 10-15 ár geti þeir ræktað nógu stóra búta af lifrarvef til þess að þeir komi að gagni við aðgerðir. Nokkrir áratugir muni hins vegar líða áður en hægt verði að rækta heila lifur sem gagnist við ígræðslu.