Bush ætlar að beita sér í málefnum Darfur

George W. Bush, forseti Bandaríkjanna, sagðist í dag myndu vinna að áætlun til að takast á við neyðarástand og mannréttindabrot í Darfur í Súdan, þar sem 200 þúsund manns hafa fallið og áætlað er að tvær og hálf milljón manna hafi flúið heimili sín. Hann tilkynnti þetta eftir fund með nýskipuðum Darfur-fulltrúa sínum um skýrslu þess síðarnefnda.

Bush tilgreindi þó ekki nánar í hverju áætlun Bandaríkjanna myndi felast.

Átökin í Darfur hafa staðið í þrjú og hálft ár með hroðalegum afleiðingum fyrir óbreytta borgara í héraðinu sem er í vesturhluta Súdans. Þarna takast á uppreisnarmenn sem ekki eru Arabar annars vegar og súdanska ríkisstjórnin, skipuð aröbum, og Janjaweed vígasveitir hins vegar. Allir aðilar sem hlut eiga í átökunum hafa verið sakaðir um gróf mannréttindabrot og stríðsglæpi.