3 milljónir Íraka á vergangi vegna átakanna

Flóttamannahjálp Sameinuðu þjóðanna áætlar að um 3 milljónir flóttamanna hafi flúið heimili sín til þess að reyna að komast burt frá átakasvæðum. Aðrar hjálparstofnanir giska á svipðar tölur og allar telja að flóttamannastraumurinn fari sífellt vaxandi. Rúmlega 1,6 milljónir hafa flúið heimalandið en litlu færri eru á vergangi í Írak.

Flestir þeir sem flýja land fara yfir til grannlandanna Jórdaníu og Sýrlands. Síðan Askariya-moskan, helgidómur sjíamúslima, var sprengd í febrúar á þessu ári hefur rúmlega hálf milljón manna flúið heimili sín, að mati íraska flóttamannaráðuneytisins.

Eftir því sem ofbeldi tengt trúarhópum eykst flýja fleiri og fleiri til svæða þar sem þeirra trúarhópar eru í meirihluta. Þannig flykkjast súnnímúslimar til súnnísvæða, sjíar til sjíasvæða, Kúrdar til norðurhlutans og kristnir menn til Nineveh-héraðsins. Þeir landshlutar sem áður voru blandaðir eru nú óðum að verða annað hvort súnní- eða sjíasvæði.